I ènn de ier i imagin che le hann fait el gir del mond in poche ore: l'artísta e gràfic spagnœl David Lopera l'ha publigad su la so pàgina del Facebook un grup de fotografie ind i quai famose stelle internazionai i eran reatraite con 60 chili de plœ. Un procediment invers al normal lavorar d'un gràfic che al lavora con personaj famós, donca, che l'è stait compagnad da forte polémiche in tut el mond.
El lavorar l'è nassud come crítica a quei che i ènn i standards e i cànon de belleza imposts dai média internazionai e, el stess Lopera, al g'ha diqiarad che l'è un tentativ de far che "la gent la aceti un poc de plœ i fomne sorapés". Insí, munid del Photoshop, al g'ha ingrossad artiste del càliber de Katy Perry, Kim Kardashian, Cobie Smulders e Emma Watson - fra i oltre. I polémiche però i ènn miga rivade domà per l'iniziativa, ma anca per el soget o mei, i sogets, drovad da l'artista. Numerose persone, defait, i hann criticad anca che el Lopera al g'hàbie retocad domà fomne e miga òmen. Con manera molt signoril, l'artista l'ha respondud che se quei che i la crítican i vœlen òmen ind i foto, che i se meten dré a un computer e i faghen el so stess lavorar coi personaj che i vœlen.
La protesta portada inanz dal David Lopera la vœl vésser un nœv tentativ de combàter quella che l'è la problemàtica de la falsa e poc sana imagin de la fomna trop magra, un'imagin che tuts i agn la crea scontent e, ind i cas plœ problemàtic, anca vítime.
Nessun commento:
Posta un commento